Pantun Hartaman

(Sebuah Parikan Madura tentang Kebijaksanaan Hidup)

Siang atanak malem atanak

Séékatanak sabun cap tanang

Siang éngak malem éngak

Séékéngaih pantun Hartaman

Taon sangak bellu’ sabharang larang

Jhe’ mintaan Nun kakanan nyaman

Témbhang ngakan olléna otang

Ngakan raporap pohong poko’en kenyang

Nyalkannyul neng budin, nyalkantong nutpennutan

Nyai ngulngul de’ ghighin, ngakan lonthong mutkelmutan

Engok ghetton lancéng satéyah

Tak kenning pellang mun kadung kareppah

Réng ghi’ éllun males ka réng towanah

Ghi’ bhuru lakoh kesusu biniyah

Rumah tangga Nak niko tak ghampang

Alako Nak kodhu pacakang

Maské sélakék lakona cakang

Mun sebini’ koros tetep nyangkol otang

Sapolo sapolon, sapoté nyaré sécelleng

Sémanglo ce’ taon, sényarv péssé cétak palengngen

Jhe’ mina-‘an Pak séré sécandi’

Nabbhu tongtong ma’cé’ jheunah

Jhe’ nyiya-an Pak oréng tak andi’

Takok tak ontong dheddhi jhudhunah

Ka Muncar Pak ka Muncarah

Ka Besokéh pokol séttong

Soro mencar Pak tak mencarah

Kajebe matéh sala séttong

Nité tak nitéyah nité perréng nutpennutan

Laké tak lakéyah mun tak ollé réng songutan

Ko’ cakalan Cong jhe’ bhitkobbhit

Jhukok kakap nyu’-un palotan

Abhakalan Cong jhe’ bitabit

Takok tak kuat ghudhenah sétan

Mun ngarenyeng pade ngarenyeng

Jhe’ jhit ngejjhit jhijhi réng raddhin

Mun senneng pade senneng

Jhe’ bitabit dhuli pakabin

Plotan, lemmit, roti nu’manu’an

Komantan ékemmit tang nyai nu’cornu’an

Ngitanggih emalem minggu

Takerhjet pas nginum jhéih

Alaké binih jhe’ salang sengghu

Sala tak manjet jhe’ rajeih

Numpak Honda Cong nubruk dokar

Bedeh sapéh negghu’ cekkocek

Ruma tangga Cong mun ghut segghut tokar

Nyaré rajhekkéh tamba kabhet

Jalganjil bere’ dejeh, Mak Ennik mikol roman

Alaké jhe’ jerajeh, nik kenik pokok nyaman

Tak ngelarang Cong éntar ka Burnih

Sokkor jhe’ sampék nyimpang Bligeh

Tak ngelarang Cong atokar laké binih

Sokkor jhe’ sampék ngiding tetanggheh

Numpak dokar Cong mung toron Bligeh

Ngalak keddhi’ akérem sorat

Atokar Cong mun ekéding tetanggheh

Tetanggheh sébeji’ tamba asorak

Solbhu’ ngampar lamak, arba’ néng ronjhengan

Embuk ngembhan anak, bapak jenunjenan

Bede paték Cong sakék menggih

Nik Dulla numpak bécak

Dheddhi réng lakék jhe’ nukolan binih

Réng bini’ sala tokol bi’ ocak

Mak Ennik Bhing tédhung pék ampék

Bede bhudeng main grambol

Dheddhi réng bini’ jhe’ pé’cerémmpék

Takok tak langgheng pas kenning sénggol

Solbhu’ nyu’un sarabih, arba’ ajenggu’en

Embuk ngucek cabbhih, bapak gu’onggu’en

Ka Sampang Cong toron Burnih

Bede ratoh namen kacang

Tak ghampang Cong nagghung anak binih

Alakoh kodhu pacakang

Tak ngelarang Nak réng namen bhakoh

Sokkor jhe’ sampék tombu kolat

Tak ngelarang Nak réng cakang lakoh

Sokkor jhe’ sampék adhinah solat

Solat toré solat pongpong ghi’ ellun matéh

Solat toré solat réng solat sangunah patéh

Bede polé réng laké binih

Ade’ ollénah éraasanéh

Mun kuat lémelléh ékasakék atéh

Niko tandhanah oréng sé-éréh

Mun sampeyan ollé rajhekkéh

Jhe’ nurotéh panasah atéh

Amal jariyah jhe’ kaloppaéh

Kotak néng masjid toré éssé’éh

Amal toré amal, réng amal sanguna patéh

Amal toré amal, tamba rejhekkéh

Tak ngelarang dhedhhi sénuman

Sokkor jhe’ sampék numinuman

Ngalamun Wiski numinumnah

Niko élarang ambi’ aghamah

Bede polé lakmellak réng nyunnat

Main litrék salang pacettat

Mi’ tak éngak dhabunah ustad

Réng main péssé kalakoan ma’siat

Arba’ ngaléncér ka Jember mellé énten

Coba’ kérpékkér bhender napa bhunten

Toré abhajang pong pong ghi’ ngudeh

Pongpong ghi’ bedeh karéna nyabeh

Mung pon nyabeh depak ka dedeh

Adu kastanah sabhareng bedeh

Nika’ pantun Nun ékarang dhibi’

Semenyanyi Nun Pak Hartaman dhibi’

Neng compok Nun erekkam dhibi’

Mung mellé neng toko sobung séandi’

Jheghung jhe’ bi’kombi’ roman sabun poté

Jhe’ tedung ghi’ ri’bheri’ Hartaman apantun polé